4-nji noýabrda Türkmenistanyň Telekommunikasiýalar we informatika institutynda Çehiýa Respublikasynyň ýokary okuw mekdepleriniň ýarmarkasy geçirildi.
Ýarmarkanyň resmi açylyş dabarasyna Türkmenistanyň bilim ministriniň orunbasary Azat Ataýew, Çehiýa Respublikasynyň Türkmenistandaky Adatdan daşary we Doly ygtyýarly ilçisi (rezidensiýasy Daşkentde) Lýubomir Frebort, şeýle hem Türkmenistanyň Telekommunikasiýalar we informatika institutynyň rektory Nurnepes Kulyýew gatnaşdylar diýip, "Türkmenistan: Altyn asyr" elektron neşiri habar berýär.
Çäräniň çäklerinde duşuşyklar geçirilip, akademiki alyşmalaryň mümkinçilikleri hem-de Türkmenistan bilen Çehiýanyň arasyndaky ikitaraplaýyn hyzmatdaşlygyň geljekki mümkinçilikleri ara alnyp maslahatlaşyldy, şolar bilim gatnaşyklaryny ösdürmäge we iki ýurduň talyplary hem-de mugallymlary üçin täze mümkinçilikleri döretmäge gönükdirilendir.
Çehiýanyň uniwersitetleriniň Aşgabatda geçirilen ýarmarkasyna türkmen ýokary okuw mekdepleriniň talyplary, uçurymlary, Türkmenistanyň orta mekdepleriniň ýokary synp okuwçylary gatnaşdy.
Çehiýa tarapyndan çärä ýurduň esasy uniwersitetleriniň, şol sanda Pragadaky Karlow uniwersitetiniň, Himiýa tehnologiýalary uniwersitetiniň, Çehiýanyň Oba hojalyk uniwersitetiniň hem-de Zlinedäki Tomaş Bati uniwersitetiniň wekilleri gatnaşdylar. Şeýle hem ýarmarkada akademiki bölümleriň we halkara edaralaryň ýolbaşçylary, şeýle hem Çehiýada okaýan Merkezi Aziýanyň talyplaryna goldaw berýän «CzechPoint.Uz» agentliginiň wekilleri boldular.
Ýarmarkanyň çäklerinde Çehiýanyň çärä gatnaşan ýokary okuw mekdepleriniň işi giňişleýin beýan edildi. Çehiýanyň uniwersitetleriniň maksatnamalary hem-de daşary ýurtlarda okamagyň geljegi, okuwa girmegiň, okamagyň we Çehiýanyň ýokary okuw mekdeplerindäki talyp durmuşy barada maglumat berildi.
