Türkmenistan GDA ýurtlarynyň arasynda dizel ýangyjynyň baha taýdan elýeterliligi boýunça birinji orny eýeleýär. Bu barada “Kazinform” halkara habarlar agentligine salgylanyp, Orient ýazýar.
Global petrol Prices (GPP) portalynyň täzelenen reýtingine görä, Türkmenistan global sanawda 7-nji orny eýeleýär. Bellenilişi ýaly, häzirki wagtda ýurtda dizel ýangyjynyň bahasy bir litr üçin 0,286 dollara barabar.
Bütin dünýäde iň arzan dizel ýangyjyny Wenesuelada tapmak bolýar – bir litr üçin bary-ýogy 0,004 dollar, iň gymmat dizel ýangyjy bolsa Gonkongda bolup, bu ýerde bir litr üçin 3,185 dollar tölemeli.
Türkmenistanda ýokary hilli nebit we nebit önümleri dünýäde öňdebaryjy nebiti gaýtadan işleýän zawodlaryň biri bolan Türkmenbaşydaky nebiti gaýtadan işleýän zawodlar toplumynda öndürilýär. Bu toplumyň önümleri Ýewropa, Aziýa we Ýakyn Gündogara eksport edilýär.
