Lucca Comics & Games çäresinde meşhur “Kalmar oýny” (Игра в кальмара) serialynyň ikinji möwsüminiň tizeri hödürlendi. Variety neşiriniň habar bermegine görä, täze möwsüm şu ýylyň 26-njy dekabrynda çykar.
Netflix tarapyndan YouTube-da ýerleşdirilen wideo eýýäm 12 milliondan gowrak tomaşa ýygnady.
Tizere görä, täze möwsüm baş gahryman Gi Hunyň wakasyny dowam etdirýär, onuň keşbini ýene Li Jonje ýerine ýetirýär. Üç ýyldan soň ol ölüm howply oýnuň soňuna çykmak üçin oňa gaýdyp gelmek kararyna gelýär. Bu gezek Gi Hun “has taýýarlykly we tutanýerli”, ýöne oýundaky täze ýoldaşlaryny dolandyrmakda kynçylyklar bilen ýüzbe-ýüz bolýar.
Resmi beýana görä, Gi Hun gatnaşyjylara abanýan howp barada duýdurýar, ýöne onuň duýduryşlaryna ähmiýet berilmeýär we dartgynlylyk barha artýar.
Öň, aktýorlar düzümine Im Şi-wanyň, Kan Ha-nylyň, Pak Son-hunyň we Ýan Dog-gynyň goşulýandygy belli boldy. Serialyň üç möwsümini döretmek meýilleşdirilýär we ahyrky möwsüm 2025-nji ýylda çykar.
2021-nji ýylda hödürlenen ilkinji möwsüm millionlarça tomaşaçyny özüne çekip, Netflix-de iň meşhur iňlis dilli däl serial boldy. Mundan başga-da, ol 14 kategoriýada “Emmi” baýragyna hödürlendi we alty baýrak gazandy.
