Instagram wideonyň hil derejesini onuň meşhurlygyna baglylykda ulaldyp-kiçeldýän syýasaty durmuşa geçirdi. Bu barada TechCrunch-a salgylanyp, 3dnews.ru habar berýär.
Instagramyň we Threadsyň başlygy Adam Mosseri ýörgünli wideolar üçin ýokary hilli kodlamagy ulanjakdygyny, meşhurlygy az wideolaryň bolsa pes hilde ýaýlyma beriljekdigini habar berdi.
Mosseriniň aýtmagyna görä, Instagram wideolary mümkin boldugyça ýokary hilli görkezmäge çalyşýar, ýöne wideo çap edilenden soň ilkinji sagatlarda görülmese, çeşmeleri tygşytlamak üçin hili awtomatiki usulda peselýär. Şeýle-de ol sözüniň üstüne, pikirleriň köpüsiniň rolik paýlaşylandan soň ilkinji sagatlarda ýüze çykýandygyny goşdy.
Meşhurlyga esaslanýan çemeleşme Meta platformalary üçin täzelik däl: kompaniýa geçen ýyldan bäri dürli kodlaýyş sazlamalaryny ulanýar. Şeýle-de bolsa, ulanyjylaryň biri Mosseriniň “Threads” wideosyny paýlaşandan soň, bu beýannama onlaýn çekişmeleri döretdi. Käbir ulanyjylar bu kararyň adalatsyzdygyny hem-de sosial torlarda meşhurlar bilen ýaňy başlan döredijileriň arasyny açyp we düşünişmezligi giňeldip biljekdigini bellediler.
Mosseri muňa jogap edip, wideolaryň hil tapawudynyň ujypsyzdygyny, tapawudyň tehniki parametrlerde däl-de, rolikleri düşürýäniň ussatlygyna hem-de mazmunyň täsirliligine baglydygyny aýtdy.
