Türkiýedäki arheologlar Rim imperiýasynyň gündogar serhedini goramak üçin IV asyrda gurlan Rim galasyny tapdylar diýip, “WokrugSweta” neşiri habar berýär.
Hasankeyfde tapylan desga imperator Konstantiý II-niň dolandyran döwrüne degişlidir. Ol Persiýa bilen serhede gözegçilik etmek üçin hyzmat edipdir we strategiki taýdan möhüm ýerlerde gurlan gorag galalarynyň bir bölegidi.
Bu açyş sungat taryhçysy Zekaý Erdalyň ýolbaşçylygyndaky gözlegçiler topary tarapyndan edildi. Topar Rim arhitekturasy boýunça hünärmenler bilen maslahatlaşdy we tapylan daş bölekleriň diwar gurmak üçin ulanylandygyny anyklady. Gurluşygyň bu usuly şol döwürdäki Rim jemgyýetçilik binalarynda giňden ulanylypdyr.
Hasankeyf - ýer ýüzündäki iň gadymy ýerlerden biridir we bu ýerde ençeme ýyl bäri gazuw-agtaryş işleri geçirilýär. Bu ýerden dürli döwürlere degişli başga-da köp sanly artefaktlar, şol sanda demir asyrynyň heýkeljikleri we XIV-XIV asyrlaryň freskleri tapyldy. Soňky gazuw-agtaryş işleri mahalynda halk lukmançylygynda ulanylýan jadylary öz içine alýan "şypa jamy", şeýle hem ýaý atyjylar üçin gorag bolup hyzmat eden halkalar tapyldy.
Hasankeyfiň gadymy desgalarynyň bölekleri 2018-nji ýylda tamamlanan Ilisu bendiniň gurluşygy netijesinde suw astynda galdy. Köp taryhy desgalar Arheoparka göçürildi we bu ýerde olar açyk asmanyň astynda saklanýar.
