Britaniýaly telekeçi, Virgin Group kompaniýasyny esaslandyryjy Riçard Brenson howa şarynda stratosfera syýahata ugrar. Bu barada The Independent habar berýär.
Işewür dünýäde şeýle görnüşli ilkinji täjirçilik uçuşyna üç gatnaşyjynyň biri bolar. Uçuşy 2025-nji ýylda amala aşyrmak meýilleşdirilýär. Şarda Brenson bilen birlikde Virgin Group-yň egindeş esaslandyryjylary Jeýn Poýnter we Taber MakKallum bolar.
Germetik kapsula 32 km belentlige galar. Mundan öň howa şarlary şeýle belentlige çykmandy. Şaryň birsydyrgyn uçuşy gaýtadan dikeldilýän wodorodyň kömegi bilen üpjün ediler.
Geljekde şarlar stratosfera sekiz ýolagçyny göterip biler. Şeýle uçuş üçin petegiň bahasy 125 müň dollar bolup, ol Space Perspective kompaniýasy tarapyndan amala aşyrylar.
“Men başdangeçirmeleri örän gowy görýärin we telekeçi kärdeşlerime olaryň biznes arzuwlaryny durmuşa geçirmäge kömek edýärin. Howa şarlaryny dolandyrmak üçin köne ygtyýarnamamdan tozany üfläp aýyrmak mümkinçiligine sabyrsyzlyk bilen garaşýaryn” – diýip, Brenson belledi.
Materialda Space Percpective-iň stratosfera şarlarynda uçuşlary gurnaýan dünýäde ilkinji kompaniýadygy bellenilýär. Kompaniýanyň wekilleriniň aýtmagyna görä, häzirki günde 1800-den gowrak öňünden sargyt resmileşdirildi.
