20-nji asyryň başynda Angliýanyň Kambriýa graflygyndaky mekdep kitaphanasyndan alnan kitap 113 ýyldan soň yzyna gaýtaryldy diýip, “Guardian” gazetiniň şenbe günündäki sanyna salgylanýan ria.ru habar berýär.
Gazetdäki makalada: "Birinji jahan urşundan öň mekdep kitaphanasyndan okamaga alnan kitap ahyrsoňy yzyna gaýtaryldy" diýlip ýazylýar.
Gürrüňi edilýän kitap, 1911-nji ýylda Leonard Ýubank atly okuwçy tarapyndan mekdep kitaphanasyndan okamaga alnan, iňlisleriň meşhur şahyry Jorj Baýronyň eserler ýygyndysydyr.
Leonard Ýubank 1893-nji ýylda doglup, orta mekdebi 1911-nji ýylda tamamlaýar we Oksford uniwersitetine okuwa girýär. Gazet makalasynda dört ýyldan soň Ýubank gözüniň pesligine garamazdan, söweşe çagyrylýar we 1916-njy ýylyň fewral aýynda wepat bolýar diýip bellenilýär.
20-nji asyryň başynda kitaphanadan alnan kitap Uelsde tapyldy we tapyndy mekdebe gaýtaryldy diýip, neşirde ýazylýar.
“Guardian-yň" bellemegine görä, bu ýygyndy taryhda tabşyrylmaly möhletinden geçen iň “köne” kitaphana kitaplaryndan biri bolup biler.
