18-nji oktýabrda «Arkadag» futbol topary AFK-nyň Çagyryş ligasynyň ilkinji möwsüminiň duşuşyklaryna gatnaşmak üçin Kuweýt Patyşalygyna ugrady. Döredilenden bäri bassyr ikinji çempionlygyny yglan eden we 50-nji duşuşygynda 50-nji ýeňşini gazanan «Arkadag» FK Kuweýtde ýaryşdan ozal bir hepdelik okuw-türgenleşik ýygnanyşygyny geçirer diýip, Türkmenistanyň Halk Maslahatynyň saýtynda habar berilýär.
Tälimçi Wladimir Baýramowyň şägirtleri ilkinji halkara ýaryşynda çykyş ederler.
Topar bije çekişligiň netijesinde «B» toparça düşdi. Bu toparçada Kuweýtiň «Al-Arabi», Maldiw adalarynyň «Maziýa» we Gyrgyz Respublikasynyň «Abdyş-Ata» toparlary hem bar. Toparçanyň duşuşyklary 26-njy oktýabrdan 1-nji noýabra çenli aralykda geçiriler. Duşuşyklaryň ählisini Kuweýt şäherindäki «Al Kuwait Sports Club» stadiony kabul eder.
AFK-nyň Çagyryş ligasy ― 2024/25.
«B» toparçanyň duşuşyklarynyň tertibi:
26-njy oktýabr
- 19:30, «Al Arabi» ― «Abdyş-Ata»;
- 23:30, «Arkadag» ― «Maziýa».
29-njy oktýabr
- 19:30, «Abdyş-Ata» ― «Arkadag»;
- 23:30, «Maziýa» ― «Al-Arabi».
1-nji noýabr
- 19:30, «Al Arabi» ― «Arkadag»;
- 21:30, «Maziýa» ― «Abdyş-Ata».
Aziýa yklymynyň üçünji derejeli klublaýyn ýaryşy bäş toparçada geçirilýär. Olaryň üçüsi Günbatar, ikisi bolsa Gündogar sebite wekilçilik edýär. «Arkadag» topary ýaryşyň çärýek finalyna çykmak üçin öz toparçasynda birinji ýa-da ikinji orny eýelemeli bolar. Toparçalarda üçünji orny eýelän toparlaryň arasyndan iň ýokary görkezijä eýe bolany hem çärýek finala gatnaşdyrylar.
Çärýek final duşuşyklaryny 2025-nji ýylyň 5 ― 12-nji marty, ýarymfinallary 9 ― 16-njy apreli aralygynda geçirmek meýilleşdirilýär. Ýaryşyň final duşuşygynyň geçiriljek ýeri we senesi barada biraz soňrak habar berler.
