Arheologlar gadymy Petra şäherinde (Iordaniýa) 2000 ýyllyk aramgähi tapdylar. Bu barada Live Science ýazýar.
Gadymy şäher kino söýüjileriň köpüsine tanyşdyr – bu ýerde Stiwen Spilberg “Indiana Jons we soňky haçly ýöriş” atly filmini surata düşürdi. Aramgäh belli “Faraonyň hazynasynyň” (El-Hazne) astynda tapyldy. 1989-njy ýyldaky filmiň sýužeti boýunça, bu ýerde Mukaddes Graal ýerleşýärdi.
Aramgähde tapylan artefaktlar b.e.öň I asyryň ortalaryndan b.e. II asyrynyň başlaryna çenli döwre degişli. Mazarda 12 adamyň jesedi tapyldy.
Jaýlananlaryň biriniň elinde ybadat üçin ulanylýan gaby ýatladýan keramiki gap bardy. Ylmy gözlegçileriň pikiriçe, bu açyş uly halkara ähmiýete eýe, sebäbi Petrada bu döwrüň mazarlary seýrek tapylýar.
Aramgäh Sent-Endrýus uniwersitetinden geofizik Riçard Beýts tarapyndan geçirilen uzak aralykdan zond barlagy arkaly tapyldy. Ol tapyndynyň şäheriň we, takmynan, 2 müň ýyl mundan ozal şalygynyň iň ýokary derejesine ýeten nabatei halkynyň taryhyna has gowy düşünmäge mümkinçilik berjekdigini belledi.
Käbir hünärmenler, şol sanda antropolog Megan Perri açyşyň ähmiýetine şübheli garap, munuň köp sanly mazarlaryň tapylan ýeri bolan Petra üçin geň däldigini aýdýar. Muňa garamazdan, arheologlaryň aglabasy tapyndyny gadymy şäheri öwrenmekde möhüm ädim hasaplaýar. Edinburg uniwersitetinden arheolog Lýusi Weýdson bu tapyndy gadymy jaýlama däplerini dikeltmäge mümkinçilik berer diýip pikir edýär.
