Hytaýda öý haýwanlarynyň eýeleri öz itlerini we pişiklerini ýörite “pişik-kafe” we “it-kafe” işe ugradyp başladylar. Bu tygşytlylyk hem-de öý haýwanlarynyň hojaýynlary ýok wagty ýüreginiň gysmazlygy üçin edilýär diýip, CNN habar berýär.
Hytaýda kafelerde işleýän öý haýwanlary myhmanlary has işjeň çekmäge kömek edýär we şeýle edaralaryň eýeleri girdeji taýdan utýarlar. Şeýle kafelere giriş adam başyna 30 – 60 ýuana barabar. Bu ýerde myhman bir çaşka kofe-de sargyt edip biler.
Hojaýynlaryň aýtmagyna görä, tomusda howanyň örän yssydygy sebäpli öýde ýeke galan öý haýwany üçin kondisioner işletmeli bolýar. Bu hem elektrik energiýasy üçin çykdajyny artdyrýar. Kafede bolsa itiň we pişigiň özi ýaly haýwanlar bilen ýüregi gysmaýar, myhmanlaryň ünsüni özüne çekýär, iým üçin pul gazanýar, şol bir wagtyň özünde öýde bolsa elektrik energiýasy tygşytlanýar.
Hytaýda hojaýynyň işe gitmezden ozal öý haýwanyny işe ibermek tendensiýasy Zhuan lingshi qian adyny aldy, bu “garbanmak üçin pul gazanmak” diýmegi aňladýar. Öý haýwanlary kafede işe doly ýa-da ýarym gün çykyp bilýärler, soňra adamlar ýaly gijesine öýüne gaýdýarlar.
Hytaýda ilkinji pişik kafesi 2011-nji ýylda Guançžou günorta şäherinde açyldy we CBNData neşiriniň maglumatlaryna görä, şeýle edaralaryň sany her ýyl 200% artýar. 2023-nji ýyla çenli ýagdaýa görä, ýurtda şular ýaly 4 müňden gowrak iýip-içmek nokady bardy. Soňky aýlarda bolsa şeýle edaralaryň hem-de öý haýwanlarynyň hojaýynlary Xiaohongshu sosial ulgamynda işe alynýandygy barada bildirişleri we rezýumeleri ýerleşdirip başladylar.
