16-njy oktýabrda Gizada synag režiminde Uly Müsür muzeýi açyldy. Bu barada Associated Press agentligine salgylanyp, The Guardian habar berýär. Bu taslamany durmuşa geçirmek üçin 22 ýyl we 1 mlrd dollardan gowrak serişde sarp edildi.
Müsüriň syýahatçylyk we gadymy ýadygärlikler ministriniň muzeýiň arheologiki meseleler boýunça kömekçisi at-Taýeb Abbasyň aýtmagyna görä, heniz belli bolmadyk resmi açylyş senesine çenli muzeýe 4 müň adam baryp görer. Synag görnüşde açylyş muzeýiň logistikasyny seljermäge hem-de doly açylmaga we syýahatçylaryň gelmegine taýýarlanmaga mümkinçilik berer.
Muzeýde jemi 12 zal bolup, olaryň her birinde azyndan 15 müň artefakt hödürlenýär. Galereýalar taryhy döwürlere we nesilşalyklara görä toparlara bölündi. Taslamanyň ýolbaşçysy Eýssa Zidanyň bellemegine görä, ähli zallar döwrebap tehnologiýalar bilen üpjün edildi: gadymy müsürliler, şol sanda patyşalar barada gürrüň berýän multimediýa tanyşdyryşlary bar, zallaryň birinde bolsa Gadymy Müsüriň jaýlama däpleri barada gürrüň bermek üçin wirtual hakykat tehnologiýasy ulanyldy.
Häzirlikçe hemme zal elýeterli däl. Ýöne beýikligi alty gatly bina ýaly, golaýdaky Giza piramidalaryna tarap görnüş berýän basgançak açyk. Muzeýiň beýleki böleklerini, şol sanda Tutanhamonyň hazynalar ýygyndysyny gijräk açmak meýilleşdirilýär.
Muzeýiň gurluşygy 2005-nji ýylda başlady. 2003-nji ýylda Heneghan Peng Architects kompaniýasy binany taslamalaşdyrmak üçin şertnama aldy. Dürli sebäplere görä muzeýiň gurluşygy ençeme gezek togtadyldy, 2022-nji ýylyň ahyrynda bolsa muzeý uly bolmadyk ekskursiýa toparlary üçin bölekleýin açyldy.
Uly Müsür muzeýine ýylda 5-7 mln adamyň baryp görmegine garaşylýar. Müsüriň syýahatçylyk ministrliginiň maglumatlaryna görä, müsürliler üçin giriş peteginiň bahasy 60 Müsür funty (1,2 dollar), daşary ýurtly syýahatçylar üçin 200 funt (4,1 dollar) bolar.
