Şu gün, 18-nji oktýabrda Aşgabatda Türki medeniýetiň halkara guramasyna (TÜRKSOÝ) agza ýurtlaryň II teatr festiwaly açylýar. Prezident Serdar Berdimuhamedow festiwala gatnaşyjylary gutlady.
Teatr festiwalynyň dowamynda TÜRKSOÝ-nyň Muzeýler birleşiginiň agzalarynyň jemleýji maslahaty, suratkeşleriň festiwaly, TÜRKSOÝ-na agza ýurtlaryň ýazyjylarynyň duşuşygy geçiriler. Olarda türki halklaryň medeniýetini, sungatyny, edebiýatyny ösdürmek we kämilleşdirmek meseleleri ara alnyp maslahatlaşylar. Bu bolsa dostlukly döwletleriň döredijilik wekilleriniň birek-birekden sungatyň inçe syrlaryny içgin öwrenmegine, tejribe alyşmagyna ýardam berer.
"Bu festiwalyň türki döwletlerden medeniýet we sungat ussatlaryny, teatr toparlaryny ak mermerli Aşgabada jemlemek bilen, teatr sungatynyň jadyly güýjüni açyp görkezjek hakyky sungat baýramçylygyna öwrüljekdigine, sahna oýunlarynyň tomaşaçylarda ýatdan çykmajak täsirli duýgulary galdyrjakdygyna berk ynanýaryn" - diýip, Serdar Berdimuhamedow belleýär.
