Nissan düýbünden täze Murano krossowerini hödürledi. Awtomobil bütinleý täze dizaýna eýe boldy we ol Ariya elektrik krossoweriniň dizaýnyny ýada salýar. Salonda hem Ariya-daky ýaly minimalizm orun aldy.
Dördünji nesil krossoweri ýol bilen aralyga (klirens) 5 sm we inligine 6,6 sm goşdy, ýöne uzynlygy we beýikligi üýtgemedi diýen ýaly, tigir bazasy hem öňküsi ýaly 2824 mm bolup galdy. Öňde oturýanlar üçin aýak goýulýan ýer hem öňküsinden giňeldi.
Interýerde diagonaly 12,3 dýuým bolan iki ekranly panel bar. Mediaulgama Google hyzmatlary birikdirildi, şeýle-de Apple CarPlay we Android Auto simsiz interfeýsleriniň goldawy, töwerekleýin syn ediş ulgamy, işjeň galmagy ýatyryş ulgamy, şeýle-de Nissan Safety Shield 360 howpsuzlyk ulgamlarynyň toplumy bar.
Tehnika böleginde iň esasy täzelik V6 hereketlendirijisiniň we wariatoryň ýoklugy boldy. Indi Murano kuwwaty 244 at güýji bolan dört silindrli 2,0 litrlik turbomotor we 9 basgançakly awtomatiki hereket geçiriji bilen enjamlaşdyrylýar. Esasy wersiýada öňdäki herekete getiriji, goşmaça töleg üçin doly herekete getiriji hödürlenýär.
Krossoweriň bahasy 2025-nji ýylyň başynda satuwa golaý mälim ediler. Esasy wersiýanyň çen bilen bahasy, takmynan, 40 müň dollara barabar.
