Canalys analitikleri üçünji çärýegiň jemi boýunça smartfon bazaryna baha berdiler we Samsung kompaniýasynyň tas öňdebaryjylygy ýitirip biljekdigini bellediler.
Kompaniýa bazaryň 18%-ini eýeledi, ýöne Apple-iň paýy-da 18% boldy, olaryň arasyndaky tapawut, analitikleriň bellemegine görä, ýarym göterimden hem az. Ýöne takyk maglumatlar berilmeýär. Bir ýyl ozal kompaniýalar, degişlilikde, 21% we 17% eýeläpdi, häzir bolsa Samsung öz paýyny ep-esli ýitirdi, Apple, tersine, sähel artdyrdy.
Şeýle-de, bazardaky görkezijisini 13%-den 14%-e çenli Xiaomi ýokarlandyrdy, Oppo 10%-den 9%-e düşdi, Vivo bolsa bir ýyl ozalky 8%-e garşy 9% paýa eýe boldy. Galan kompaniýalaryň ählisi bilelikde bir ýyl ozalky ýaly 32% paý aldy.
Analitikler iPhone 15 modeline we has köne modellere bolan ýokary islegiň Apple kompaniýasyna öz paýyny artdyrmaga mümkinçilik berendigini belleýärler. Dördünji çärýegiň netijesi, ilkinji nobatda, täze iPhone smartfonlarynyň çykmagyna görä kesgitlener.
Ýeri gelende bellesek, 16-njy oktýabrda Apple kompaniýasynyň hyzmatlarynda köpçülikleýin bökdençlik bolup geçdi. Ýaponiýadan, Awstraliýadan başlap, Russiýa, Kanada we ABŞ çenli dürli ýurtlarda kompaniýanyň App Store dükany, Apple onlaýn goldaw saýty, Apple Music we beýleki hyzmatlary açylmagyny bes etdi diýip, Çempionat portaly habar berýär.
Bu näsazlygyň näme bilen baglanyşyklydygy belli däl. Kompaniýa bu barada hiç hili teswir bermedi we hyzmatlaryň haçan kadaly işlejekdigini aýtmady.
