Germaniýanyň BMW awtoulag ägirdi wodorod elektromobilleriniň uly bolmadyk seriýasyny satuwa çykarmaga taýýarlanýar diýip, 32Cars.ru habar berýär.
Kompaniýadaky wodorod awtoulaglary taslamasynyň ýolbaşçysy Ýurgen Güldner wodorody köpçülikleýin önümçilige girizmegiň wagtynyň gelendigine ynanýar.
Onuň aýtmagyna görä, wodorod tehnologiýalary barha ösýär we onýyllygyň ahyryna çenli köp ýerlerde elýeterli bolar.
Batareýa bilen işleýän elektromobillere garanyňda, wodorod awtoulaglarynyň birnäçe artykmaçlyklary bar. Olara-da, benzinli awtoulaglar ýaly, birnäçe minutda ýangyç guýup bolýar. Bu bolsa, batareýalara ýygy-ýygydan zarýad bermek mümkinçiligi bolmadyk adamlar üçin wajypdyr.
Mundan başga-da, mysal üçin ABŞ-da we Ýewropa Bileleşiginde infrastrukturanyň ösmegi bilen, wodorod awtoulaglarynyň bahasy ep-esli düşmeli bolar.
