Amerikaly aýdymçy Teýlor Swift aýdym-saz taryhynda iň köp girdeji gazanan konsert syýahaty bolan “Eras Tour” barada kitap çykarar. Bu barada ol sosial ulgamlarda habar berdi.
Swift dünýä boýunça çykyşlary barada “ýatlama galdyrmak” isleýändigini belledi. Munuň üçin ol iki taslamany – “The Tortured Poets Department: Antology” albomynyň relizini we kitap çap etmegi ýola goýdy.
Aýdymçynyň aýtmagyna görä, kitap “şahsy pikirlerden” we “hiç haçan görkezilmedik perde aňyrsyndaky suratlardan” ybarat. 256 sahypalyk kitap 29-njy noýabrda satuwa çykar.
“Gaty daşly kitapda 500-den gowrak surat, şol sanda her döwürdäki çykyşlardan alnan öň görkezilmedik suratlar, taýýarlykdaky eksklýuziw suratlar we tutuş syýahatyň dowamynda ulanylan gurallaryň, kostýumlaryň, bezegleriň we dizaýn eskizleriniň perde aňyrsyndaky suratlary hödürlendi” – diýip, Swift belledi.
“Eras” konsert syýahaty 2023-nji ýylyň mart aýynda başlady we häzirem dowam edýär. Ol dekabr aýynda Kanadanyň Wankuwer şäherinde tamamlanar. Ol ýerde Swift soňky dört albomyny: “Lover”, “Folklore”, “Evermore” we “The Tortured Poets Department” albomlaryny goldamak üçin 149-njy konsertini geçirer.
Belläp geçsek, Swiftiň film-konserti kinoprokatda Martin Skorsezeniň soňky işi bolan “Gül Aýynyň ganhorlaryndan” öňe geçdi.
Swift “Eras” wagty milliarder boldy we iň baý zenan sazandalaryň reýtinginde Riannadan öňe geçdi. Şeýle-de, ol MTV VMA-da ýekelikde ýeňişleriniň sany boýunça Beýonseniň rekordyny täzeledi, Londondaky Wiktoriýa we Albert muzeýi bolsa ol hakda sergi açdy.
