Britaniýaly daýhan Ýan Nelson kädiden “Bitljusyň” mozaikasyny düzdi diýip, UPI agentligi habar berýär. Daýhanyň aýtmagyna görä, mozaika üçin mowzuk özüniň we kärdeşleriniň ses bermegi arkaly saýlandy. Netije sesleriň 70%-iniň “Bitljusa” berlendigini görkezdi. Şondan soň daýhan we beýleki höwesjeňler işe girişdiler.
“Mozaikany döretmek üçin 10 müňden gowrak kädi we kabaçok gerek boldy. Taslamany meýilleşdirmek üçin, takmynan, 50 sagat, ony iş ýüzüne geçirmek üçin bolsa 15 adamyň gatnaşmagynda bary-ýogy bir gün sarp edildi” – diýip, Nelson gürrüň berdi.
Häzirlikçe täze mozaikanyň 2023-nji ýylda kädiniň kömegi bilen “Roždestwonyň öňüsyrasyndaky elhençlik” multfilminden Jek Skellingtonyň şekilini döretmek bilen goýlan dünýä rekordyny täzelejekdigi ýa-da ýokdugy belli däl.
Ýatlap geçsek, 1998-nji ýylyň “Bitljus” filminiň ikinji bölümi 2024-nji ýylyň 5-nji sentýabrynda dünýä prokatyna çykdy. Onda rollary Jenna Ortega, Monika Belluççi, Ketrin O’Hara, Maýkl Kiton, Waýnona Raýder, Uillem Defo we beýleki aktýorlar ýerine ýetirdi.
