Günorta Koreýanyň Hyundai awtoulag öndürijisi Germaniýanyň Zeiss kompaniýasy bilen bilelikde innowasiýa tehnologiýasyny hödürledi diýip, IT Home neşiri habar berýär.
Kompaniýa golografiki displeýleriň hatyrasyna adaty gural panellerinden ýüz öwrer. Spidometr, ýangyjyň derejesi we nawigasiýa ýaly, ulag hakyndaky ähli maglumatlar ýarym dury interfeýs görnüşinde alynky aýnada görkeziler.
Golografiki displeýleriň önümçiligi Günorta Koreýanyň Kengido welaýatynda ýerleşýän Hyundai Mobis zawodynda ýola goýlar.
Tehnologiýanyň aýratynlygy adaty ekranlary awtoulagyň interýerinden doly çykarmakdyr - ähli zerur maglumatlar alyn aýnada görkezilýär we ulanyjy gurallary sazlamaga hem-de diňe özüne gerekli maglumatlary ekrana çykarmaga mümkinçilik alýar. Ýolagçy hem güýmenje hyzmatlaryna girmek üçin golografiki displeýi ulanyp biler, şol bir wagtyň özünde onuň üçin maglumatlar sürüjä päsgel bermeýän görnüşde sazlanar.
Alyn aýnalardaky gologrammalar Mersedes S-Class ýaly käbir modellerde eýýäm ulanylyp ýör, ýöne Hyundai bu tehnologiýany tutuş gural paneli boýunça durmuşa geçiren ilkinji öndüriji bolar. Prototipi 2024-nji ýylyň sentýabr aýynda çykaryldy we müşderilerden oňyn seslenme aldy. 2027-nji ýylda tehnologiýany köpçülikleýin öndürmek we awtoulaglara birikdirmek meýilleşdirilýär.
Hyundai bu täzelik sürüjilere amatlylyk we howpsuzlyk döredip, salonyň ekranlaryna az üns bermäge we ünsüni öňdäki ýola jemlemäge mümkinçilik berer diýip hasaplaýar.
