Italiýanyň iň meşhur modelýeri, Giorgio Armani lýuks moda öýüni esaslandyryjy Jorjio Armani “Corriere della Sera” gündelik gazeti bilen söhbetdeşlikde geljek iki-üç ýylyň içinde pensiýa çykmagy meýilleşdirýändigini aýtdy.
“Kompaniýanyň ýolbaşçysy hökmünde ýene iki-üç ýyl işläp bilerin. Ondan köp däl, bu oňaýsyz bolardy” – diýip, ol belledi.
Tas 50 ýyl mundan ozal döreden kompaniýasynyň geljekki garaşsyzlygyny gorap saklamaga çalyşmak bilen, ol özüniň moda imperiýasyny dolandyrmak üçin “özboluşly gurluşy, taslamany, teswirnamany döredendigini” habar berdi, ýöne bu barada giňişleýin aýtmady.
Moda işine gelmezden ozal Armani lukmançylyk ugrundan bilim aldy, fotosuratçynyň kömekçisi bolup işledi, soňra harby gulluga gitdi. Gullukdan soň, 1957-nji ýylda Armani Milanyň uniwermaglarynyň birine işe ýerleşdi. Ol ýerde ammarçy, witrina bezegçisi, haryt satyn alyjy bolup işläp, karýerasyny ýola goýdy. Söwdada işlemek oňa marketingiň esaslaryny öwretdi we moda pudagy barada ilkinji bilimleri berdi.
1960-njy ýyllarda Jorjio modelýer we Cerruti 1881 moda öýüni esaslandyryjy Nino Çerrutiniň elinde dizaýner boldy. Ol ýerde alty ýyl töweregi erkek egin-eşiklerini biçdi we tikdi, soňra beýleki meşhur dizaýnerleriň ýanynda-da stilist bolup işledi.
Armani öz kompaniýasyny 1975-nji ýylda esaslandyrdy. Bir ýyldan soň bolsa öz ady bilen ilkinji taýýar eşik kolleksiýalaryny hödürledi.
Armaniniň mirasdüşerleriniň arasynda onuň aýal dogany, bu kompaniýada işleýän ýene üç maşgala agzasy, onuň ençeme wagtdan bäri egindeşi we hyzmatdaşy Pantaleo Dell’Orko we haýyr-sahawat gaznasy bolar diýlip garaşylýar.
