18-nji noýabrda Türkmenistanda ýokary okuw mekdepleriniň talyplarynyň arasynda statistika dersi boýunça Internet bäsleşigi geçiriler. Bäsleşik Halkara Bitaraplyk güni mynasybetli guralýar diýip, ORIENT agentligi habar berýär.
Bäsleşik statistika bilen baglanyşykly meseleleri seljermäge ukyply zehinli ýaşlary terbiýelemäge, ýaşlaryň statistika bolan höwesini artdyrmaga, şeýle hem ýaş nesliň intellektual ösüşini kämilleşdirmäge gönükdirilendir. Bäsleşige her ýokary okuw mekdebiniň adyndan hünärine garamazdan üç talyba çenli gatnaşyp bilýär.
Bäsleşik her ýokary okuw mekdebiniň binasynda wideoragatnaşyk arkaly sagat 14:00-da başlar.
Ders bäsleşigi Türkmenistanyň Döwlet energetika institutynyň sanly bilim portalynyň esasynda guralar. Portal jogapkär mugallymlar üçin intellektual ders bäsleşiginiň geçirilýän gününde elýeterli bolar.
Bäsleşik türkmen dilinde test soraglar we ýumuşlar görnüşinde geçiriler. Gatnaşmagyň esasynda alyp boljak iň ýokary ball 120-ä deňdir.
Ýumuşlary ýerine ýetirmek üçin gatnaşyjylara 60 minut wagt berler.
Gatnaşyjylar we jogapkär mugallymlar baradaky maglumatlar 2024-nji ýylyň 1-10-njy noýabr aralygynda tdei@tdei.edu.tm elektron salgysyna iberilmeli.
