General Motors (GM) Miçigan ştatynyň Uorren şäherindäki tehniki merkezinde batareýa öýjükleriniň prototipini işläp taýýarlaýan zawody gurmagy meýilleşdirýändigini mälim etdi. Taslama 145 million dollar maýa goýlar we ony 2027-nji ýylda işe girizmek meýilleşdirilýär.
32Cars.ru portalynyň belleýşi ýaly, bu ädim elektrik ulaglary üçin batareýalaryň işläp taýýarlanyşyny çaltlaşdyrmaga we özüne düşýän gymmatyny azaltmaga gönükdirilendir.
Bu zawoda goýulýan maýa goýumlary GM-iň Uorren şäherindäki tehniki merkezini ösdürmek boýunça has giň tagallanyň bir bölegidir, bu kompaniýa oňa soňky bäş ýylda eýýäm 2,5 milliard dollar maýa goýdy.
Täze merkez tehnologiýalaryň çalt üýtgeýän şertlerinde aýratyn möhüm bolan prototipleriň işlenip taýýarlanyşy bilen köpçülikleýin önümçiligiň arasyndaky aralyk tapgyr bolar. GM-niň akkumulýatorlar boýunça wise-prezidenti Kurt Kelty bu inisiatiwanyň täze himiki düzümleri has çalt barlamaga we täze akkumulýator tehnologiýalaryny ösdürmegiň wagtyny gysgaltmak bilen, çykdajylary optimizirlemäge mümkinçilik berjekdigini belledi.
Şeýle hem, taslama GM-niň önümçilik hyzmatdaşlarynyň netijeliligini ýokarlandyrmaga gönükdirilendir. Keltiniň sözlerine görä, täze merkez täze akkumulýator tehnologiýalarynyň ösüş wagtyny bir ýyla çenli azaldar, bu bolsa elektrik ulagynyň täze modelleriniň bazara çykarylyşyny çaltlaşdyrar.
