“Uimbledon” tennis ýaryşynyň guramaçylary indiki möwsümden ýaryşyň 147 ýyllyk taryhynda ilkinji gezek çyzyk eminlerini ulanmakdan ýüz öwrüp, olary emeli aň bilen çalşyrar. Bu barada “The Times” neşirine salgylanyp, RIA Nowosti habar berýär.
Habar berlişi ýaly, 18 oýun kortunyň ählisinde, şol sanda Merkezi kortda indiki ýyl awtomatlaşdyrylan Electronic Line Calling (ELC) ulgamy gurnalar.
“Uimbledonda” ilkibaşda öňden bäri dowam edip gelýän adaty bes etmek we ELC-e geçmek islenilmedi, ýöne guramaçylar emin-adamlary ulanmagy dowam etdirmek bilen ýaryşyň ýokary ülňülerine zyýan ýetirilip bilinjekdigi baradaky netijä geldiler. ELC iň gowy oýunçylaryň eýýäm öwrenişen has takyk eminlik ulgamy hasaplanylýar” – diýip, neşir ýazýar.
Häzire çenli “Uimbledonda” iki hepdäniň dowamynda 650-den gowrak oýna hyzmat etmek üçin 18 – 80 ýaş aralygynda 300 töweregi çyzyk emini gerek bolýardy.
