Türkmenistanyň Italiýadaky ilçisi T.Kömekow şol bir wagtda Gresiýada diplomatik işini ýerine ýetirip başlady. 8-nji oktýabrda Afiny şäheriniň Prezident köşgünde Gresiýanyň Prezidenti Katerina Sakellaropula hatlarynyň gowşurylyş dabarasy geçirildi diýip, Türkmenistan habarlar portaly habar berýär.
T.Kömekow diplomatik işini Rim şäherinden ýerine ýetirer.
Dabaranyň dowamynda Gresiýanyň Prezidenti Türkmenistanyň Prezidentine mähirli gutlaglaryny, türkmen halkyna bolsa iň gowy arzuwlaryny ýollady.
Dabaranyň dowamynda özara bähbitli ugurlar boýunça Türkmenistanyň we Gresiýa Respublikasynyň arasyndaky dostlukly gatnaşyklarynyň mundan beýläk-de ösdürilmegine gyzyklanma bildirildi.
T.Kömekow Gresiýa Respublikasyna amala aşyran iş saparynyň dowamynda Gresiýanyň DIM-niň Protokol bölüminiň başlygy Aglaýa Balta hem ynanç hatlarynyň nusgalaryny gowşurdy.
Mundan başga-da, ilçiniň Gresiýa Respublikasynyň daşary işler ministriniň orunbasary Aleksandra Papadopulu bilen duşuşygy geçirildi. Duşuşygyň dowamynda syýasy-diplomatik, söwda-ykdysady we medeni-ynsanperwer häsiýetli ileri tutulýan ugurlar boýunça ikitaraplaýyn hyzmatdaşlygyň möhüm meseleleri ara alnyp maslahatlaşyldy. Ikitaraplaýyn saparlaryň amala aşyrylmagynyň meselelerine aýratyn üns berildi.
