3-nji oktýabrda Türkmenistan bilen Argentinanyň daşary syýasat edaralarynyň düzüm bölümleriniň ýolbaşçylarynyň derejesinde syýasy geňeşmeleri geçirildi. Türkmenistanyň DIM-niň habar bermegine görä, wideoaragatnaşyk ulgamy arkaly geçirilen bu geňeşmeler hasap boýunça üçünji boldy.
Duşuşykda taraplar ikitaraplaýyn gatnaşyklaryň häzirki ýagdaýyna baha berdiler we söwda, ykdysadyýet, bilim, medeniýet we syýahatçylyk ýaly möhüm ugurlarda hyzmatdaşlygyň geljegini ara alyp maslahatlaşdylar.
Duşuşyga gatnaşyjylar BMG ýaly halkara guramalarynyň çäklerinde hyzmatdaşlygy dowam etdirmäge taýýardyklaryny tassykladylar we özara gatnaşyklaryň täze ugurlaryny öwrenmek üçin açyk gepleşikleri geçirmäge meýillidiklerini mälim etdiler.
Şeýle-de geňeşmeleriň dowamynda taraplar medeni alyşmalar meselelerini, şol sanda iki ýurduň halklarynyň arasyndaky gatnaşyklary pugtalandyrmak üçin bilelikdäki çäreleri we maksatnamalary guramak mümkinçiligini ara alyp maslahatlaşdylar.
Türkmen tarapy indiki syýasy geňeşmeleri geçirmegi, şeýle hem 2025-nji ýylda Aşgabatda Türkmen-argentin işewürlik forumyny guramagy teklip etdi. Şol bir wagtyň özünde iki ýurduň arasynda parlamentara gatnaşyklaryny işjeňleşdirmek teklip edildi.
Ýokarda beýan edilen teklipler argentin tarapynyň oňyn seslenmesine eýe boldy.
