ABŞ-nyň Kent döwlet uniwersiteti bilen Türkmenistanyň ýokary okuw mekdepleriniň üçüsi özara düşünişmek hakynda Ähtnama gol çekdiler.
Bu ýokary okuw mekdepleri - Halkara ynsanperwer ylymlary we ösüş uniwersiteti, Türkmenistanyň Daşary işler ministrliginiň Halkara gatnaşyklary instituty hem-de Türkmen döwlet binagärlik-gurluşyk instituty.
Degişli resminamalara 2-nji oktýabrda Türkmenistanyň bilim ministriniň orunbasary A.Ataýewiň ýolbaşçylygyndaky wekiliýetiň ABŞ-a iş saparynyň çäklerinde Ogaýo ştatynyň Kent şäherinde Kent döwlet uniwersitetiniň rektory Tod Dýakon bilen duşuşygynyň netijeleri boýunça gol çekildi. Bu barada "Türkmenistan: Altyn asyr" elektron neşiri habar berýär.
Taraplar möhüm meseleleriň hatarynda Türkmenistanda Kent döwlet uniwersitetiniň şahamçasynyň açylmagyny, türkmen wekiliýetiniň öňünden taýýarlan ýol kartasynyň taslamasyny ara alyp maslahatlaşdylar. Bu başlangyja degişli hemme ugurlaryň üstünde taraplar şu saparyň dowamynyň çäklerinde jikme-jik işlemegi maksat edindiler.
