Abraýly 50 Best reýtingleriniň awtorlary 2024-nji ýylda dünýäniň iň gowy myhmanhanalarynyň sanawyny düzdüler. Ol William Reed kompaniýasy tarapyndan başlanan taslamanyň saýtynda peýda boldy.
Şeýlelikde, žurnalistlerden, otelýerlerden we syýahatçylyk pudagynda hünärmenlerden ybarat bolan 600 sany hünärmen iň rahat myhmanhanalary saýladylar. Olar ses berişligiň netijesini Londondaky dabarada yglan etdiler.
Reýtingiň lideri Tailanddaky Capella Bangkok myhmanhanasy boldy. Ol 2023-nji ýylyň sanawyndaky 11-nji orundan 10 setir ýokary galdy. Myhmanhanada bäş restoran, şol sanda şef-aşpez Mauro Kolagrekonyň bir Mişlen ýyldyzly restorany, şeýle-de derýa kenarynda hususy basseýnleri bolan 7 willa bar.
Ikinji orny 2023-nji ýylda iň gowy myhmanhana bolan Italiýanyň Komo kölünde ýerleşýän Passalacqua eýeledi. Üçünji orunda Rosewood Hong Kong ýerleşdi.
Ilkinji bäşligi Parižiň Cheval Blanc we Gonkongyň The Upper House myhmanhanalary jemledi. Şeýle-de, ilkinji onlukda Raffles Singapore, Aman Tokyo, Maldiwlerdäki Soneva Fushi, Dubaýdaky Atlantis The Royal we Indoneziýanyň Sumba adasyndaky Nihi Sumba bar.
Umuman, reýtinge Beýik Britaniýa, Tailand, Meksika, Braziliýa, Awstraliýa, Günorta Amerika, Marokko, Ispaniýa, ABŞ, Şri-Lanka, Hindistan, Oman we Fiji ýaly ýurtlaryň myhmanhanalary girdi.
50 best guramasy myhmanhanalaryň reýtingini eýýäm ikinji gezek neşir edýär. Şeýle-de, ol aşpezlik dünýäsinde 2002-nji ýyldan bäri “Dünýäniň iň gowy 50 restoranyny” we 2009-njy ýyldan bäri “Dünýäniň iň gowy 50 baryny” hödürleýär.
