Täze Zelandiýanyň iň iri şäheri bolan Oklenddäki Eden Park stadionynda hakanyň iň uly köpçülikleýin çykyşy boýunça dünýä rekordy goýuldy. Bu barada The Guardian neşiri habar berdi.
29-njy sentýabrda bu çärä 6500 töweregi adam gatnaşyp, 2014-nji ýylda Fransiýada goýlan öňki rekorddan (4028 adam) geçdi. Bu çäre “rekordy öýe gaýtaryp getireliň” şygary astynda geçirildi.
Haka - täze zelandiýaly maorileriň däp bolan harby tansy, ol başda garşydaşlary gorkuzmak we söweşden öň ruhlandyrmak üçin söweş çagyryşy hökmünde ulanylypdyr, häzirki wagtda bolsa medeni barabarlygyň we jebisligiň beýany hasaplanýar. Aýaklaryňy sazlaşykly tapyrdatmak, bökmek, ýumruklaryň bilen urmak, gygyrmak, ýüz-gözüňi oýnatmak - bu hakä häsiýetli hereketler we sesler Täze Zelandiýanyň medeniýetine çuňňur ornaşypdyr we ýerli regbi toparlary tarapyndan oýundan öň däp hökmünde ulanylýar.
Gatnaşyjylar Ginnesiň rekordlar kitabynyň talaplaryny kanagatlandyrmak üçin hakanyň iň meşhur görnüşi bolan Ka Mate tansyny yzly-yzyna dört gezek ýerine ýetirdiler.
Rekord goýýan tansa Täze Zelandiýanyň teleýaýlymynyň alyp baryjysy Konan O'Braýen, režissýor Taýka Waýtiti we öňki boksçy Dewid Tua ýaly meşhur adamlar gatnaşdy. Rekordlar kitabynyň emin agzasy Braýan Sobel bu ýazgynyň goýlandygyny tassyklady, ýöne gatnaşyjylaryň jemi sany entek takyklanmady.
