Kaliforniýadaky bir mekdep has irki döwre degişli haýwanlaryň galyndylarynyň ýatan ýeri bolup çykdy. Okuw jaýynyň ýerastynda geçirilen gurluşyk işlerinde daşa öwrülen ýüzlerçe galyndylar tapyldy. Olaryň käbiriniň 9 million ýyl ýaşy bar.
Envicom kompaniýasynyň medeni meseleler boýunça müdiri Ueýn Bişoffyň aýtmagyna görä: “Bu geçmişiň tutuş ekosistemasydyr. Bu açyş netijesinde, barlagçylar ekologiýanyň 9 million ýyl ozal nähili bolandygyna düşünip bilerler”.
Tapyndylaryň arasynda kitleriň, guşlaryň, gylyç dişli gyzyl balygyň we megalodonyň we beýleki balyklaryň galyndylary bar. Iki ýylyň dowamynda gazuw-agtaryş işleri geçirilip, baý paleontologiki ýygyndy ýüze çykaryldy. Tapyndylaryň iň täsin görnüşi bolsa, Günorta Kaliforniýada ozal tapylmadyk gylyç dişli gyzyl balygyň galyndylarydyr. Bu balyklaryň uzynlygy 2,5 metre we agramy 90-180 kg golaý.
Häzirki zaman ak akulasyndan üç esse uly megalodonyň dişleri aýratyn ünsi özüne çekdi.
Tebigy taryh muzeýiniň ýolbaşçysynyň kömekçisi Ostin Hendi, galyndylaryň ýerleşýän ýerlerine görä 9 million ýyl ozal kenar ýakasynyň nirede bolandygyny kesgitläp boljakdygyny aýtdy. Tapyndylaryň tapylan ýerleriniň günbatarynda ýitip giden adanyň bolan bolmagy ähtimal.
