21-25-nji sentýabrda Malaýziýanyň paýtagty Kuala-Lumpur şäherinde 6-njy Bütindünýä innowasiýa babatynda oýlap tapyş taslama bäsleşigi we sergisi (6th World Invention Competition and Exhibition, WICE) geçirildi. Bäsleşik Indoneziýanyň ýaş alymlar assosiasiýasy we Malaziýanyň MAHSA (Malaysian Allied Health Sciences Academy) uniwersitetiniň bilelikde guramagynda geçirildi diýip, Türkmenistanyň Bilim ministrliginiň metbugat gullugy habar berýär.
Bu halkara taslama bäsleşigine Türkmenistandan 4 okuwçy gatnaşdy. Olar öz taslama işleri bilen internet arkaly hasaba alnyp, bäsleşigiň jemleýji (final) tapgyryna gatnaşmaga hukuk gazandylar. Bu topara mekdep-internatynyň informatika mugallymy Öwezgeldi Janalyýew ýolbaşçylyk etdi.
Bäsleşige Indoneziýa, Meksika, Malaýziýa, Gazagystan, Amerikanyň Birleşen Ştatlary, Günorta Afrika Respublikasy, Günorta Koreýa, Türkiýe, Hindistan, Birleşen Arap Emirlikleri, Belarus, Tailand, Bangladeş, Wýetnam ýaly dünýä ýurtlaryndan 126 sany zehinli okuwçy gatnaşdy.
Bäsleşikde Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň 11-nji synp okuwçysy Myratlyýew Kerimberdi “Novalorep web sahypasy” atly taslama iş bilen ýörite sylaga we altyn medala, 12-nji synp okuwçysy Mergenow Oguzhan “Atmosfera gözegçilikli ammary” atly taslama iş bilen, 11-nji synp okuwçysy Ödemyradow Rahmanberdi “E-ulag web sahypasy”, atly taslama iş bilen,10-njy synp okuwçysy Arslanow Aýhan “E-rent web sahypasy” atly taslama işi bilen kümüş medallara mynasyp bolmagy başardylar.
