«Mançester Siti» kluby baş tälimçi Hosep Gwardiolanyň şu tomusda topardan gitjekdigini resmi taýdan yglan etdi. Ispaniýaly hünärmen 2016-njy ýylyň iýul aýyndan bäri kluba ýolbaşçylyk edip, baş tälimçi wezipesinde on ýyl boldy.
Şol bir wagtyň özünde Gwardiola City Football Group holdinginiň düzüminden gitmez. Ol «Mançester Sitidäki» işini tamamlandan soň, bu toparyň global ilçisi wezipesini eýelär. Bu rolda tejribeli hünärmen CFG-niň düzümindäki beýleki klublara tehniki maslahatlary berer, şeýle hem aýratyn taslamalara we hyzmatdaşlyklara gatnaşar.
«Menden gitmegimiň sebäbini soramaň. Sebäp ýok, ýöne men içimden wagtymyň gelendigini duýýaryn. Hiç bir zat ebedi däl, eger şeýle bolan bolsa, men bu ýerde galardym. Ýöne meniň şu «Mançester Sitime» bolan söýgim, duýgular, adamlar we ýatlamalar müdimilik galar» – diýip, Gwardiola belledi.
«Sitide» işlän döwründe Gwardiola klubuň taryhyndaky iň üstünlikli tälimçi boldy. Onuň ýolbaşçylygynda topar 20 sany uly kubogy, şol sanda APL-iň 6 titulyny, Çempionlar ligasyny, 3 gezek Angliýanyň kubogyny, 5 gezek Liganyň kubogyny, Klublaýyn dünýä çempionatyny, UEFA Superkubogyny we 3 sany Angliýanyň Superkubogyny gazandy.
Gwardiolanyň döwründe 2022/23 möwsümi aýratyn orun eýeleýär, şol wagt «Mançester Siti» trebl edip — APL-de, Angliýanyň kubogynda we Çempionlar ligasynda çempion boldy. 2023/24-nji ýylda bolsa topar iňlis futbolynyň taryhynda yzygider dört çempionlyk titulyny gazanmagy başaran ilkinji klub boldy.
Iň soňky möwsüminde Gwardiola «Siti» bilen Angliýanyň Kubogyny hem-de Liganyň kubogyny aldy. Ispaniýaly hünärmeniň toparyň başynda iň soňky duşuşygy «Aston Willa» toparyna garşy bolar. Klubuň bellemegine görä, bu duşuşyk onuň üçin «Mançester Sitiniň» baş tälimçisi hökmünde 593-nji oýun bolar.
Ýeri gelende bellesek, ygtybarly sport insaýderi Fabrisio Romanonyň berýän maglumatyna görä, toparyň indiki baş tälimçisi Enso Mareska bolar.
