Ýaponiýanyň dolandyryjy Liberal-demokratik partiýasynyň (LDP) başlygy Sigeru Isiba parlamentde ýurduň premýer-ministri saýlandy. Deputatlaryň aglaba köplügi oňa ses berdi diýip, TASS habar berýär.
Esasy aşaky palatada geçirilen ses berişligiň jemi boýunça Isiba 465 sesden 291 ses aldy. Konstitusion-demokratik partiýanyň lideri Ýosihiko Noda 100 ses aldy.
Imperator Naruhito Isibany hökümet baştutany wezipesine tassyklandan soň, ol ýurduň taryhynda 102-nji premýer-ministr bolar.
Öň, Isiba LDP başlygy we şonuň netijesinde premýer-ministr wezipesi üçin göreşde dört gezek ýeňildi. 2024-nji ýylda öz dalaşgärligini bäşinji gezek hödürlemek bilen, Isiba munuň iň soňky synanyşygy boljakdygyny aýtdy diýip, The Japan News ýazdy.
Isiba partiýa içindäki saýlawlarda ýeňiş gazanandan soň, onuň premýer-ministr wezipesine bellenilmegi resmi ýagdaýdady, sebäbi Liberal-demokratik partiýa parlamentiň iki palatasyna-da gözegçilik edýär.
67 ýaşly Isiba ozal goranmak ministri we oba hojalyk ministri wezipelerini eýeledi. Ol premýer-ministr wezipesinde awgust aýynda ikinji möhlete dalaş etmejekdigini mälim eden Fumio Kisidanyň ornuny eýelär.
