Sky Group iňlis metbugat-konglomeraty Warner Bros. film kompaniýasyny Harri Potter serialyny bilelikde öndürmek baradaky şertnamasyny bozmakda aýyplap, kazyýete berdi. Bu barada Financial Times we Variety habar berdi.
Nýu-Ýorkuň kazyýetine berlen talap arzasyna görä, Warner Bros. Sky bilen bilelikde ýylda dört serialy maliýeleşdirmegi we öndürmegi teklip etmäge borçlanypdyr, olary Sky eksklýuziw ýagdaýda Beýik Britaniýada we Ýewropada ýaýlyma berip biljek eken. Şeýle-de bolsa, Warner Bros. şertleri ýerine ýetirmän, Harri Potter hakyndaky serialy özüne galdyrmagy ýüregine düwüpdir we ony özüniň Max onlaýn-kinoteatrynyň Ýewropada giňelmeginiň esasy agramly daşy edip goýupdyr.
Talap arzasynda: "Harri Potter hakyndaky düýbünden üýtgeşik we deňsiz-taýsyz serialy maliýeleşdirmekde we öndürmekde hyzmatdaş bolmak mümkinçiliginiň ýitirilmegine biperwaý garap bolmaz" diýilýär.
Kompaniýalaryň arasyndaky şertnamanyň 2025-nji ýylyň ahyrynda tamamlanjakdygy we serialyň bolsa 2026-njy ýylda çykaryljakdygy, takmynan şol wagtlar hem Max-yň Beýik Britaniýada peýda boljakdygy bellenilýär.
Sky “Harri Potter” brendiniň azyndan 25 milliard dollar bahasynyň bardygyny aýdyp, zyýanyň “azyndan” ýüzlerçe million dollar boljakdygyny çaklaýar.
Warner Bros.-da talap arzasyny esassyz diýip atlandyrdylar we Sky-yň talaplaryna berk garşy durjakdyklaryna söz berdiler.
Harri Potter hakyndaky serialy on ýylyň dowamynda goýbermek meýilleşdirilýär, her möwsüm Joan Roulingiň ýedi kitabyndan birini ekranlaşdyrarlar. Rouling taslamada ýerine ýetiriji prodýusser bolup çykyş eder.
