Nýu-Ýorkly Skott Staýn atasynyň Ikinji jahan urşundan ýany bilen getiren ýapon baýdagyny miras aldy. Ol Skottuň öýünde uzak wagtlap asylgy durdy we bir gezek ony gözden geçirýärkä, ýapon dilindäki ýazgylary tapdy diýip, “Wokrug Sweta” neşiri ýazýar.
“Bu baýdagy her gezek atamyň öýüne girenimde görýärdim. Uruş hakda hiç zat aýtmasa-da, baýdagyň onuň üçin gaty ähmiýetlidigini bilýärdim – diýip, häzir 55 ýaşly Skott gürrüň berdi. - Baýdagy nireden we nähili ýagdaýda alandygyny biz asla bilibilmän galdyk, ýöne agyr söweşleriň içinden geçendiginden habarlydyk".
Görlüp oturylsa, bu ýöne bir baýdak bolman, “şowlulygyň baýdagy” diýlip atlandyrylýan, ýapon esgerleriniň şahsy tumary bolup, garyndaşlary fronta ugramazyndan öň oňa isleglerini ýazýar ekenler. Esgerler ony eşikleriniň astynda, ýörite haltajykda göteripdirler, hiç haçan ýanyndan aýyrmandyrlar. Ýapon dilinde şeýle baýdaklara "gyzyl günüň aşagyndaky ýazgylar ýygyndysy" diýlip terjime edilýän "ýosegaki hinomaru" diýilýän eken. Baýdakdan Skott onuň eýesiniň - Ýukikazu Hiýamanyň adyny tapdy.
Skott Ikinji jahan urşunda wepat bolan ýapon esgerleriniň nesillerini gözleýän OBON Society bilen habarlaşdy. Bir wagtlar Ýukikazuwyň baýdagyna gol çeken 50 adamyň garyndaşlaryny gözlemek ýedi ýyl dowam etdi. Ahyrsoňy, 2024-nji ýylyň awgust aýynda Honsýu adasyndaky uzak obada şol esgeriň ýekeje ogly, 81 ýaşyndaky Sukasu Hiýamany tapmagy başardylar.
Sukasa kakasyny hiç haçan görmändir, ol ilkinji çagasynyň dünýä inen güni imperatoryň goşunyna gulluk etmäge gidipdir we 1945-nji ýylda söweşde wepat bolupdyr. Sukasa baýdagyň yzyna gaýtarylyp berilmegini ejesiniň arzuwynyň hasyl bolmagy diýip atlandyrýar, sebäbi Ýukikazuwyň söweşde wepat bolandygy baradaky habardan başga, maşgala onuň ne jesedini alypdyr, ne-de bir goş-golamyny.
Baýdagyň yzyna gaýtarylyş dabarasynda Sukasa: "Baýdagy elimde alamda, ilkinji gezek kakamyň ýylylygyny duýup bildim. Ejem ikimiz ol hakda känbir gürleşip ýöremzokdyk, ýöne çagalygymdan bäri onuň nähili bolandygyny, nähili adamdygyny, ysynyň nähilidigini duýmaga, göz öňüne getirmäge synanyşýardym” – diýdi.
