“Time Out” žurnaly 2024-nji ýylda dünýäniň iň ajaýyp etraplarynyň (raýonlarynyň) reýtingini düzdi. Sanawa, hünärmenleriň pikiriçe, özboluşly atmosferany, medeni köpdürlüligi we ýerli aýratynlyklary özünde jemleýän etraplar girdi. Reýting dürli ýurtlardan žurnalistleriň we redaktorlaryň pikirine esaslanýar.
“Time Out” topary iýmit, içgiler, sungat, medeniýet ýaly birnäçe ölçegleri, şeýle-de her sebitiň özboluşly taraplaryny göz öňünde tutdy.
“Bu öz şäherlerinde iň gowy zatlary – olaryň medeniýetini, ruhuny, gijeki durmuşyny, iýmitini we içgilerini görkezýän ýerler. Bularyň ählisi – bir gyzgalaňly etrapda” – diýip, reýtingiň awtorlary belleýär.
Şeýlelikde, birinji orny Fransiýanyň Marsel şäherindäki Notr-Dam-dýu-Mon etraby eýeledi. Bu ýer özüniň köçe sungaty bilen belli bolup, ýiti graffitileri, häzirki zaman suratkeşleriniň eserlerini, galereýalary we özboluşly restoranlary görmek bolýar.
Ikinji orunda Marokkonyň Kasablanka şäherindäki Al-Fida-Mers-sultan etraby ýerleşdi. Redaktorlar onuň hakykylygyna, moda desgalarynyň ýoklugyna we bu ýeriň gadymy ruhuny saklamaga kömek eden üýtgeşik arhitektura üns berdiler. Al-Fida-Mers-Sultan özüniň ýönekeýligi we özboluşlylygy bilen gymmatlydyr.
Üçünji orun Indoneziýanyň Bali adasyndaky Pererenan etrabyna degişli boldy. Bu ýer el degrilmedik kenarlary, rahat kafeleri we goh-galmagaldan hem hysyrdylardan azat bolan ýakymly atmosferasy bilen syýahatçylary özüne çekýär.
Şeýle-de, dünýäniň iň gowy etraplarynyň ilkinji onlugyna Seuldaky Sonsu-don, Portlendäki Kerns, Bristoldaky Stouks-Kroft we Sent-Pols, Sidneýdäki Çippendeýl, Lissabondaky Prinsipe Real, Rio-de-Žaneýrodaky Gloriýa hem-de Melburndaky Windzor etraplary girdi.
