Meta giňeldilen hakykat äýnegi Orion-yň prototipini görkezdi. Ol beýleki AR gurluşlarynyň köpüsi ýaly uly däl diýip, Engadget ýazýar.
Äýnek golografiki elementleri hakyky dünýä goşmak bilen, “smartfonyň ekran çarçuwasy bilen çäklenmeýän sanly täsirleri” döretmäge mümkinçilik berýär. Hakykat bilen özara baglanyşyk emeli aňyň kömegi bilen üpjün edilýär, bu hem gurluşy hem ýapyk binada, hem köçede ulanmaga mümkinçilik berýär.
Orion kremniý karbidinden bolan linzalarda gologrammalary şöhlelendirýän Micro LED proýektorlary bilen enjamlaşdyrylandyr. Bu hem gurluşy ykjam we ýeňil edýär. Görüş meýdany 70 gradus töweregi bolup, görüş giňligini we göz bilen dolandyrmak mümkinçiligini üpjün edýär. Şeýle-de, äýnek bilezigiň kömegi bilen hereket arkaly dolandyrmagy-da goldaýar.
Esasy funksiýalar wideo jaňlary, Facebook Messenger-de we WhatsApp-de habarlar bilen alyşmagy, şeýle-de Spotify we YouTube ýaly programmalar bilen integrasiýany öz içine alýar. Orion-a, meselem, bar bolan önümleriň esasynda resept hödürleýän emeli aň Meta AI gurnaldy.
Meta häzirlikçe gurluşyň diňe Meta işgärlerinden we synag edijilerden çäkli ulanyjylar toparyna elýeterlidigini aýdýar. Äýnegi köpçülikleýin çykarmak hem meýilleşdirilýär, ýöne takyk çykyş senesi yglan edilmedi. Meta-nyň baş müdiri Mark Sukerberg gurluşyň üstündäki işleri dowam etdirmek bilen, esasy maksatlaryň biriniň uly auditoriýa elýeterli bolmagy üçin onuň bahasyny arzanlatmakdygyny belledi.
