Meta kompaniýasy Luiziana ştatynda (ABŞ) 4 million inedördül fut (371 600 inedördül metr töweregi) meýdany bolan emeli aň maglumat merkezini gurýar, bu takmynan 70 futbol meýdançasyna deňdir.
Reuters-iň habar bermegine görä, desganyň umumy çykdajysy takmynan 10 milliard dollar bolar. AP maglumat merkeziniň 3 milliard dollardan gowrak bahasy bolan infrastrukturany talap etjekdigini belleýär. Taslama garşy çykýanlar elektrik energiýasynyň bahasynyň ýokarlanmagyndan we sebitiň ýaşaýjylary üçin suw ýetmezçiliginiň ýüze çykmagyndan howatyrlanýarlar.
WIRED neşiriniň berýän maglumatlaryna görä, 2025-nji ýylyň tomsunda Luiziananyň Jemgyýetçilik hyzmatlary boýunça komissiýasy maglumat merkezini işletmek üçin üç sany gaz turbinasynyň çalt depginde gurulmagyny tassyklady. Olary Entergy Luiziana kompaniýasy dolandyrar. Entergy desgany birikdirmek we oňa hyzmat etmek üçin infrastrukturasyna Metanyň gönüden-göni özüniň töleýändigini düşündirdi. Olaryň baha bermegine görä, toruň çydamlylygyny döwrebaplaşdyrmakda müşderileriň çykdajylarynyň takmynan 10% azaljakdygyny we tupanlardan soň dikeltmek üçin goşmaça tölegleriň hem azaljakdygyny çaklaýarlar.
Meta merkeziň 500 sany täze iş ornuny döretjekdigini we 1000-5000 aralygynda gytaklaýyn iş orny bilen üpjün etjekdigini habar berdi.
Taslamany tankytlaýanlar ýerli ýaşaýjylara ýetip biljek täsirler babatda aladalanýarlar. Jorjiýada şuňa meňzeş merkez gurlanda ilat suw üpjünçiligi meselesinden zeýrenipdiler. Bu barada Meta täze merkeziň ýerasty suwlary ulanmajakdygyny we ýerli ýaşaýjylaryň bolsa guýulardan suw alýandygyny aýtdy. Garaşsyz ekspertiza desganyň işiniň suw üpjünçiligine zyýanynyň ýetmejekdigini tassyklaýar. Meta-nyň wekili maglumat merkezleriniň köp suw talap edýändigini, ýöne kompaniýanyň bu babatda durnuklylygy üpjün etmek üçin degişli çäreleri görendigini aýtdy.
