ABŞ-nyň Ýellouston milli seýilgähinde iň meşhur geotermiki çeşmeleriň biri bolan “Morning-Glori-Pul” howzunyň suwy syýahatçylaryň teňňe we zir-zibil taşlamagy netijesinde açyk gök reňkini ýitirdi diýip, New York Post habar berýär.
Ýyllarboýy bu ýere gelýänler seýilgähiň düzgünlerini bozup gelipdirler. Bu bolsa howdanyň hapalanmagyna we temperaturasynyň üýtgemegine getirdi.
Žurnalistleriň berýän maglumatlaryna görä, suwuň sowamagy bakteriýalaryň köpelmegine sebäp bolup, çeşmäniň reňkini üýtgetdi. Ilkibaşda köl çyrmaşygyň gülüne meňzeýän ýiti gök reňki bilen tapawutlanýardy, çeşmäniň ady hem şondan gelip çykýar.
Seýilgäh kölüň düýbünden ýüzlerçe teňňäni we beýleki zatlary aýryp, ençeme gezek ony arassalamaga synanyşdy. Işgärler howzuň suwuny sordurmak üçin ýörite ýangyn ulaglaryny ulandylar, ýörite torlaryň kömegi bilen çuňlugy 7 metre ýetýän kraterden hapa galyndylary aýyrdylar.
Soňky döwürde syýahatçylaryň howza has seresap çemeleşýändikleri we howdanlara zat zyňmagy seýrekledendikleri bellendi.
