21-nji sentýabrda Türkmenistanyň ähli künjeklerinden orta mekdepleriniň 10-njy, 11-nji we 12-nji synplaryň okuwçylarynyň gatnaşmagynda «Parahatçylygyň ýaş çaparlary» atly intellektual taslamasynyň IV möwsümine gatnaşmak hukugyna eýe bolmak onlaýn arkaly saýlama-synag tapgyry geçirildi.
Türkmenistanyň Daşary işler ministrliginiň Halkara gatnaşyklary institutynyň Ýaş diplomatlar mekdebi tarapyndan guralan saýlama-synag tapgyryna 800-den gowrak okuwçy gatnaşdy. Synag mekdep maksatnamasynyň Türkmenistanyň taryhy, bütindünýä taryh, Türkmenistanyň medeni mirasy, dünýä medeniýeti, iňlis dili, rus dili ýaly dersleri boýunça taýýarlanylan ýazuw arkaly sowallaryň 100-sini özünde jemledi. Mundan başga-da, test-sowallaryň üsti bilen okuwçylaryň intellekt görkezijisiniň (IQ) derejesine hem-de logiki pikirlenip bilişlerine baha berildi.
Taslamanyň täze möwsümi «Bitarap Türkmenistanyň parahatçylyk döredijilik diplomatiýasy: netijeli hyzmatdaşlygyň we durnukly ösüşiň ygtybarly guraly» diýen umumy şygar astynda geçer.
Synag tapgyrynda iň gowy netijeleri görkezen okuwçylaryň 64-si bäsleşigiň IV tapgyryna gatnaşmaga hukuk alarlar. Synagyň netijeleri Türkmenistanyň Daşary işler ministrliginiň Halkara gatnaşyklary institutynyň saýtynda yglan ediler, şol saýtda hem bäsleşige gatnaşyjylar üçin bäsleşik barada hemme maglumatlar ýerleşdiriler.
