“Gün batandan dogýança” (От заката до рассвета) we “Günäler şäheri” (Город грехов) filmleri bilen belli bolan režissýor Robert Rodriges CBS kanaly üçin täze “Zorro” serialyny döretmäge girişdi. Bu barada Deadline habar berýär.
Täze wersiýada ar alyjy Zorrony Tehas ştatynyň Ostin şäheriniň ýaşaýjylarynyň bähbitlerini goraýan ýaş latyn amerikaly zenan janlandyrar.
Ssenariýany Rebekka Rodriges we Jon Lawin ýazdy. Baş keşbi ýerine ýetirjek aktrisanyň ady heniz aýan edilmedi.
“Zorro” serialyny düşürmek taslamasy täze däl. Bu barada ilkinji gürrüňler 2020-nji ýylda peýda boldy we şol wagt ol NBC kanaly üçin meýilleşdirildi.
Zorro ilkinji gezek XVII asyryň başynda Ispaniýanyň halk ertekilerinde peýda boldy. Gahrymanyň iň meşhur janlandyrmalary Alen Delonyň we Antonio Banderasyň gatnaşmagynda düşürilen filmler boldy. Şu ýyl ispan telewideniýesinde Migel Bernardo bilen “Zorro” atly täze serial çykdy.
