Apple Original Films Mattel kompaniýasynyň meşhur Matchbox oýnawaç awtoulag tapgyryna esaslanýan doly metražly söweşjeň filmi (boýewik) surata düşürer diýip, Deadline habar berýär.
Film Skydance we Mattel Films tarapyndan öndüriler, “Taýler Reýk” ekşn-filmi bilen tanalýan Sem Hargreýw bolsa oňa režissýorlyk eder.
Baş keşbi eýýäm “Forsaž 9” we “Bumblbi” ýaly taslamalara gatnaşan aktýor we pälwan Jon Sina ýerine ýetirer.
Filmiň edebi esasyny Jonatan Tropper bilen Dewid Koggeşall ýazdy. Häzirlikçe sýužetiň jikme-jiklikleri aýan edilmedi, ýöne taslama ulagjyklar, gaýyklar, tanklar we beýleki ulag serişdeleri ýaly meşhur oýunjaklardan ruhlanan dinamiki ekşn boljakdygyny wada berýär.
Matchbox brendi 1953-nji ýylda ulag muşdagy Jek Odell tarapyndan esaslandyryldy. Onuň ilkinji modeli, mekdebe uly oýunjak getirmek gadagan edileni üçin, gyzyna niýetläp ýasan kiçijik ulagjygydy. Ol çagalaryň arasynda ajaýyp meşhurlyk gazanan kiçijik ulag ýasady. Bu Odelli otluçöp gabyna sygýan kiçijik oýnawaç ýasamaga itergi berdi (matchbox iňlis dilinden terjime edilende “otluçöp gutujygy” diýen manyny aňladýar). Netijede, ýokary hilliligi we bölek şaýlaryna berilýän üns bilen şu güne çenli meşhur bolan tutuş bir işiň esasyny goýdy.
1982-nji ýyla çenli Matchbox ulagjyklary Lesney Products kompaniýasy tarapyndan öndürildi, ýöne ol batansoň, brendiň hukuklaryny Universal Toys bilen Dewid Ýe satyn aldy. 1997-nji ýylda olary ony Mattele satdylar.
