Dünýäde iň uly smartfon bazarlarynyň biri bolan Hytaýda täze iPhone 16 smartfonlary resmi relizinden öň 11% arzanladyş bilen satylyp başlandy. Apple-iň täze smartfonlarynda gurnalan emeli aň funksiýalarynyň bolmazlygy bu smartfonlara bolan islegiň peselmegine getirdi. Şonuň üçin Pinduoduo we Taobao ýaly Hytaýyň iň uly onlaýn-reteýlerleri Apple-iň flagman gurluşlaryna uly arzanladyş hödürleýär.
PDD Holdings kompaniýasyna degişli bolan we ýurtda iň meşhur elektron söwda platformalarynyň biri bolan Pinduoduo 512 GB ýatly iPhone 16 Plus-y 8999 ýuan ($1268) bilen hödürleýär. Bu resmi baha 9999 ýuandan 10% arzandyr. 128 GB ýatly iPhone 16 11% arzanladyş bilen satylýar, bu hatarda bahanyň iň möhüm arzanlamagydyr.
Pinduoduo we Taobao (soňkusy Alibaba Group Holding kompaniýasyna degişli) 256 GB ýatly iPhone 16 Pro Max üçin 4% arzanladyş hödürläp, onuň bahasyny 400 ýuan, 9599 ýuana çenli arzanladýarlar. Alibaba-nyň ýene bir platformasy Tmall göterimsiz 24 aý garaşaryna berýär.
Ýeri gelende bellesek, Alibaba bu maglumatlaryň çeşmesi bolan South China Morning Post gazetiniň hem eýesidir.
iPhone 16 barada aýdylanda, anna güni satuwa çykjak bu smartfonlar häzirlikçe emeli aň funksiýalary bilen üpjün edilmez, olaryň relizi oktýabr aýyna meýilleşdirilýär. Bu innowasiýanyň bolmazlygy bolsa Hytaýyň smartfon bazaryndaky bäsdeşligi göz öňünde tutsaň, smartfon satuwyna täsirini ýetirip biler. Şeýle-de, bu ýagdaý ýakynda täze Mate XT smartfonyny hödürlän Huawei-niň işjeňligi bilen has ýitileşýär.
