ÝB-niň Kazyýetiniň ýokary instansiýasy bolan Ýewropa kazyýeti Apple korporasiýasynyň 13 mlrd ýewro möçberde tölenilmedik salgydy tölemelidigi barada karar çykardy. Karar öň amerikan kompaniýasyny goldan kazyýetiň aşaky instansiýasynyň çözgüdi ýatyrylandan soň çykaryldy.
2016-njy ýyldan bäri seredilýän kazyýet işi Ýewrokomissiýanyň Apple bilen Irlandiýanyň häkimiýetleriniň arasyndaky bikanun salgyt ylalaşygy baradaky netijeleri bilen baglanyşyklydyr. 2016-njy ýylda Ýewrokomissiýa Irlandiýanyň Apple kompaniýasyna ÝB-niň düzgünlerini bozýan salgyt ýeňilliklerini hödürländigini nygtap, kompaniýany 13 mlrd ýewro möçberde salgydy gaýtaryp bermäge borçlandyrdy.
2020-nji ýylda Apple bu çözgüde garşy çykdy we ÝB-niň umumy ýurisdiksiýa kazyýeti (EGC) bikanun salgyt ýeňillikleri babatynda subutnamalaryň ýeterlik däldigi sebäpli Ýewrokomissiýanyň talabyny ýatyrdy. Şeýle-de bolsa, Ýewropa kazyýeti Ýewrokomissiýany goldap, bu çözgüdi ret etdi.
Bloomberg bu kararyň şu ýyl öz işini tamamlaýan ÝB-niň monopoliýa garşy müdiri Margret Westageriň karýerasynda möhüm pursatdygyny belleýär.
Apple Ýewropa kazyýetiniň kararyna nägilelik bildirdi. Kompaniýanyň wekili: “Şu günki karar bizi lapykeç etdi, sebäbi öň umumy ýurisdiksiýa kazyýeti faktlara seredip, bu talaby düýbünden ýatyrypdy” diýip belledi.
