Dünýäniň birinji raketkasy italiýaly Ýannik Sinner US Open 2024-üň (ABŞ-nyň Açyk çempionaty) ýeňijisi boldy. 9-njy sentýabra geçilen gije erkekleriň arasynda ýekelikde geçirilen ýaryşyň finalynda ol amerikaly Teýlor Fritsden 6:3, 6:4, 7:5 hasabynda üstün çykdy.
OptaAce-iň habar bermegine görä, italiýaly tennisçi ýaryşa dünýäniň 140-njy raketkasy amerikaly Makkenzi Makdonald bilen birinji tapgyr oýnunda ilkinji setde utulmak bilen başlady – 2:6, 6:2, 6:1, 6:2. Şeýlelikde, Sinner XXI asyryň başlangyç setde utulyşdan soň US Open-de ýeňiş gazanan ilkinji tennisçisi boldy.
Soňky 50 ýylda ýaryşa diňe iki oýunçy şowsuz başlapdy: Jon Makinroý (1981) we Patrik Rafter (1998).
Zenanlaryň arasynda ýekelikde geçirilen ýaryşyň aýgytly oýnunda dünýäniň ikinji raketkasy belarusly Arina Sobolenko amerikaly Jessika Pegulany (ATP-niň reýtinginde 6-njy setir) utdy. Duşuşyk 7:5, 7:5 hasabynda tamamlandy.
26 ýaşly belarusly türgen 2023-nji we 2024-nji ýyllarda Awstraliýanyň Açyk çempionatyndaky ýeňişlerinden soň ýekelikde “Uly tuwulga” ýaryşlarynda üçünji titulyny gazandy. Şeýle-de, onuň hasabynda US Open-de (2019) we Australian Open-de (2021) jübüt görnüşde ýeňişler bar.
