Dubaýda dünýäde beýikligi boýunça diňe häzirki rekord eýesi “Burj-Halifadan” yza galjak ikinji gökdirän bina gurlar. Bu bina Kuala-Lumpurdaky 679 metrlik Merdeka 118 diňinden beýik bolar diýip, jaý gurujy Azizi Developments X sosial ulgamynda habar berdi. Muny RBK ýetirýär.
Bina “Burj-Azizi” diýlip atlandyrylar we onuň beýikligi 725 metr bolar. Ol Şeýh-Zaýed-Roud ýolunda gurlar. Taslamanyň bahasy 1,63 mlrd dollar bolup, gurluşyk işleriniň 2027-nji ýylda tamamlanmagyna garaşylýar.
Azizi Developments “Burj-Azizini” heniz ýanwar aýynda tanyşdyrdy, ýöne şol wagt binanyň takyk beýikligi kesgitlenmändi. Eger bina gurulsa, dünýäde iň beýik iki gökdirän Dubaýda ýerleşer.
Taslama görä, diňiň dizaýny gönüburçly şekillerde oýlanyp, ol beýikligiň artmagy bilen daralýar. Binanyň fasady doly aýna bolar.
Binada söwda merkezi, kaşaň rezidensiýalar we penthauslar, ýedi ýyldyzly myhmanhana we “özboluşly syn ediş meýdançasy” ýerleşdiriler. Binanyň bir bölegini naharhanalar we beýleki hyzmat kärhanalary eýelär.
Belläp geçsek, dünýäde iň beýik bina bolan Burj-Halifanyň beýikligi 163 gat bilen 828 metre barabar. Ol 2004 – 2010-njy ýyllarda emirligiň ykdysadyýetini diwersifikasiýalaşdyrmak maksady bilen guruldy. Binada otaglar we ofis jaýlary, restoranlar, sport zallary, basseýnler, syn ediş meýdançalary we ş.m. bar.
