UFC-niň öňki çempiony Konor Makgregor 2025-nji ýylda Irlandiýanyň Prezident saýlawlaryna gatnaşmak isleýändigini mälim etdi. Ol bu barada X sosial ulgamyndaky sahypasynda aýtdy.
Makgregor ýurduň häzirki syýasy ugruna nägilelik bildirip, häkimiýetleri ýönekeý raýatlaryň bähbitlerini äsgermezlik etmekde we kiçi işewürligi dargatmakda günäkärledi.
Onuň aýtmagyna görä, Irlandiýa işçileriň we telekeçileriň hukuklaryny gorap biljek “halkyň içinden çykan işjeň Prezident” gerek. Makgregor özüniň geljekki saýlawlarda “ýeke-täk logiki saýlawdygyna” ynanýar.
34 ýaşly söweşiji öň hem birnäçe gezek syýasata gatnaşmak mümkinçiligine yşarat etdi we sosial hem syýasy meselelere işjeň jogap bermegi dowam etdirýär.
Makgregoryň soňky söweşi UFC 264-de bolup, amerikaly Dastin Porýe bilen duşuşdy. Söweş irlandiýalynyň şikes almagy sebäpli birinji raundda tamamlandy.
