Täze Zelandiýa infrastrukturanyň ösüşini we daşky gurşawyň goragyny maliýeleşdirmek üçin syýahatçylyk salgydyny ýokarlandyrýar. 2024-nji ýylyň 1-nji oktýabryndan daşary ýurtly syýahatçylar 100 Täze Zelandiýa dollaryny (takmynan, 62 ABŞ dollary) tölemeli bolarlar, bu häzirkiden üç esse köpdür. Şeýle-de, wizalaryň bahasy 341 Täze Zelandiýa dollaryna çenli ýokarlanar diýip, South China Morning Post habar berýär.
Ýurduň syýahatçylyk ministri Mett Dusi täze salgydyň beýleki ýurtlar bilen deňeşdirilende henizem bäsdeşlige ukyply bolup galýandygyny we syýahatçynyň umumy çykdajysynyň, takmynan, 3%-ini emele getirýändigini belledi.
Goşmaça serişdeler uzak sebitlerde infrastrukturanyň ösüşine hem-de daşky gurşawyň goragyna gönükdiriler.
Syýahatçylyk Täze Zelandiýanyň ykdysadyýetiniň esasy ugry bolup, ýylda 13 mlrd TZ dollaryndan gowrak girdeji getirýär. 2023-nji ýylda ýurda, takmynan, 3,2 mln daşary ýurtly geldi.
Tourism Industry Aotearoa statistika saýtynyň maglumatlaryna görä, syýahatçylyk pudagy harytlaryň we hyzmatlaryň umumy eksportynyň 20%-ini düzýär. Koronawirus pandemiýasyndan öň syýahatçylyk pudagy Täze Zelandiýanyň JIÖ-niň 9,3% töweregini emele getirýärdi, ol ähli iş orunlarynyň 13%-den gowragyny üpjün edýärdi.
