“Rokki” franşizasyny dörediji we esasy keşbi ýerine ýetiriji Silwester Stallone meşhur filmiň prikweliniň üstünde işleýändigini habar berdi. Inspire Me UK podkastyna beren interwýusynda aktýor ssenariýanyň eýýäm birnäçe sahypasyny ýazandygyny we täze taslama boýunça aýdyň göz ýetirmeleriniň bardygyny aýtdy.
Stallone prikweliň gahrymanlaryň durmuşynyň has irki ýyllaryna bagyşlanjakdygyny belledi.
“Men ony özbaşdak ýazmagy dogry hasaplaýaryn. Edriany 15 ýaşda, Rokkini 17 ýaşda görmek... “Hanym we Ykmanda” ýaly, ýöne hakyky adamlar bilen. Bu ajaýyp bolar” – diýip, aktýor belledi. Gürrüň Rokki Balboanyň we geljekki söýgülisi Edrianyň ýaşlygy barada gidýär, bu asyl filmiň wakalaryndan öň gahrymanlaryň häsiýetlerini we olaryň ösüşini açyp görkezmäge mümkinçilik berer.
Häzirlikçe taslamanyň çykjak senesi ýa-da başga maglumatlar belli däl. Şeýle-de bolsa, franşizanyň muşdaklary meşhur boksçynyň taryhynda täze bir bölüme bil baglap bilerler. “Rokkiniň” 1976-njy ýylda çykan birinji bölümi Stallonä uly meşhurlyk we iň gowy erkek keşbi hem ssenariýa üçin “Oskar” baýragynda nominasiýa getirdi. Tutuş franşiza dünýä prokatynda 1 mlrd dollardan gowrak girdeji gazandy we Maýkl B.Jordan bilen “Krid” spin-offuna sebäp boldy.
