Hindistan geljek bäş ýylyň dowamynda syýahatçylyk üçin iň meşhur global ugurlaryň ilkinji onlugyna girmegi meýilleşdirýär. Bu barada respublikanyň syýahatçylyk we medeniýet ministri Gajendra Singh Şekhawat “The Economic Times” gazeti tarapyndan guralan World Leaders Forum halkara ykdysady forumynda aýtdy diýip, TASS belleýär.
“Hindistan geljek bäş ýylda dünýäniň syýahatçylyk üçin iň gowy ugurlarynyň onlugyna girer” – diýip, gazet ministriň sözlerini getirýär. Häzir Hindistan 119 syýahatçylyk ýurdunyň arasynda 39-njy orny eýeleýär.
“Dünýä ykdysadyýetinde syýahatçylygyň goşandy, takmynan, 10,4%-e deň. Şunuň bilen deňeşdirilende, bizde häzir 7,9%. Biziň ykdysadyýete goşýan goşandymyz 10%-den geçer we biz geljek bäş ýylyň dowamynda ortaça global görkezijiden ýokary geçeris” – diýip, Şekhawat aýtdy.
Ministr 2047-nji ýyla çenli syýahatçylygyň esasy ugurlaryň birine öwrüljekdigini belledi. Häzirki wagtda daşary ýurt syýahatçylary Hindistanyň 28 ştatyndan 9-ysyna, şeýle-de Deli milli okrugyna baryp görýärler. Ýurduň 6 ştatynyň we Deliniň paýyna syýahatçylaryň 65%-i düşýär. Häkimiýetler ýurduň baý medeniýeti we aşhanasy bilen syýahatçylary çekip, beýleki sebitleri-de ösdürmegi maksat edinýärler.
