2024-nji ýylda Parižde geçirilen Olimpiýa oýunlarynda kümüş medal gazanan türkiýeli atyjy Ýusuf Dikeçiň ýörite enjamsyz, asuda halda, bir elini jübüsinde saklap duran ýagdaýy sosial ulgamlarda uly meşhurlyk gazandy. TGRT Haber-iň habar bermegine görä, indi türgen bu duruş pozasyny patentlemek we öz haryt nyşanyna öwürmek kararyna geldi.
Dikeç Türkiýäniň patentler we haryt nyşanlary edarasyna ýüz tutdy. Iki hepde ozal bölüme Dikeçiň adyndan arza gelip gowşan eken, ýöne 51 ýaşly türgen şol arzanyň özüniňki däldigini habar berdi.
“Keseki adamyň arzasy bizi çäre görmeli diýen netijä getirdi. Türkiýä diňe bir kümüş medal getirmek bilen çäklenmän, eýsem ýurdumyzyň öňe gitmegine möhüm goşant goşan Ýusuf Dikeçiň haryt nyşany baradaky arzasyna seredilende biz höwes bilen araçy bolup çykyş ederis"- diýip, žurnalistler Markiz Patent kompaniýasynyň direktory Orhan Erimanyň sözlerini getirýär.
