2019-njy ýylda Nvidia-nyň paýnamalary 3,776% ýokarlanaly bäri kompaniýanyň işgärleriniň köpüsi millioner boldy. Girdejileriniň az-küş däldigine garamazdan, olaryň iş günleri dartgynly bolmagynda galýar diýip, Bloomberg habar berýär.
Häzirki we öňki işgärleriň sözlerine görä, kompaniýanyň esaslandyryjysy we ýerine ýetiriji direktory Jensen Huang işgärlere gaty berk talap bildirýär. Işgärler, köplenç, hepdede ýedi gün gijä çenli işlemeli bolýarlar, köpüsiniň şahsy işlerini etmek üçin wagtlary galmaýar diýen ýaly. Nvidia-nyň öňki işgäri ýygy-ýygydan ýüze çykýan içerki dawalar we işiň agyrlygy üçin, kompaniýanyň iş gurşawyny "gysyp-gowrujy" diýip häsiýetlendirýär. Muňa garamazdan, işgärleriň köpüsi geljekde has ýokary girdeji gazanmak umydy bilen kompaniýada galýarlar.
Sebäbi paýnamalara bolan hukuk, adatça, dört ýylyň içinde berilýär, bu işgärleri işlemegi dowam etdirmäge höweslendirýär. 2023-nji ýylda Nvidia-nyň işgärleriniň 5,3% -i gitdi. Şeýle-de bolsa, kompaniýanyň maýa goýum derejesi 1 trillion dollardan geçenden soň, bu görkeziji iki esse töweregi kemeldi we 2,7% boldy. Umuman aýdanyňda, ýarymgeçiriji pudagynyň işgärleriniň gelip-gidişi ep-esli ýokary - 17,7%.
Paýnamalaryň bahalarynyň güýçli ýokarlanmagy Nvidia-nyň işgärleriniň beýleki kompaniýalarda ýarymgeçiriji pudagynda işleýän kärdeşlerinden süýşürintgileriniň has köpdügini aňladýar. Mysal üçin, kompaniýa 11 ýyl ozal gelen, Nvidia-nyň maliýe direktory Kolett Kress takmynan 758,7 million dollarlyk paýnamalara eýelik edýär. Aýlygy has ýokary, ýöne kompaniýada iş möhleti az bolan, Intel-den gelen kärdeşi Deýw Zinsneriň 3,13 million dollarlyk paýnamasy bar. AMD-yň maliýe direktory, 2023-nji ýylda işe başlan Jin Huwyň 6,43 million dollarlyk paýnamasy bar.
Mundan başga-da, Nvidia öz ýolbaşçylaryna ýokary derejede ynamlydygy bilen hem tanalýar. Glassdoor-da Jensen Huang 97% reýtinge eýe, bu Alphabet, Apple we Meta Platforms ýaly kompaniýalaryň ýolbaşçylaryndan has ýokarydyr.
